Enpatia eta euskararekiko eta euskal kulturarekiko interes handia dira 96 pertsonak parte hartu duten ekintzetatik lehen inpresioak.
Maiatzean eta uztailean, Elkarbizitzarako zubiak eraikitzen proiektuko ekintzak gauzatu dira Nafarroan eta Euskadin. Proiektu honen helburua da euskara, kultura eta euskal nortasuna sustatzea eta ezagutzea.
Lan saioetan 16 pertsonak hartu dute parte, eta sei udalerritan egin dira: Nafarroako hiru udalerritan eta Euskadiko beste hirutan, probintzia bakoitzeko bat. Gure gizartearen egungo errealitate soziodemografikotik hurbilen dagoen ikuspegi errealistagoa izateko, lurralde bakoitzeko hizkuntza- eta migrazio-testuingurua hartu da kontuan lekuak eta parte-hartzaileak aukeratzeko. Horrela, Nafarroako lan-saioak Elizondon, Berriozarren eta Tuteran egin dira, eta Euskadikoak Amurrion, Bilbon eta Donostian.
Udalerrien aukeraketari bezala, jarraipen berezia egin zaio parte-hartzaileen bilaketan, eta, horrela, adin, profil soziolinguistiko eta soziodemografiko desberdineko pertsonek parte hartu dute saioetan.
Etorkinek euskararekiko eta euskal kulturarekiko duten jarrera eta itxaropenak aztertzeko, haien esperientziak ulertzeko eta euskara ikasteko dituzten oztopoak identifikatzeko, bi lan-saio egin dira hautatutako udalerri bakoitzeko. Saio bakoitzean talde dinamikak garatu dira, euskararen ikaskuntza eta tokiko kulturaren eta nortasunaren ezagutza ludikoa eta eskuragarria sustatzeko, interesa sustatuz eta balizko beldur edo oztopo psikologikoak murriztuz.
Elkarbizitzarako zubiak eraikitzen programaren barruan programatutako ekintzak amaitu ondoren, orain da bildutako informazio guztia aztertzeko unea. Ekintza horien emaitzak bi txostenetan jasoko dira, eta udazkenean emango zaizkie Nafarroako Foru Gobernuari eta Eusko Jaurlaritzari, proiektu hau bi erakundeekin sinatutako lankidetza esparruaren barruan egiten ari baita.
