Hizkuntza eta kultura plan integral baterantz. Ezagutzaren garapena komunitate eleaniztun eta kulturaniztun batean

2022/10/22 09:00 - 13:30

Nafarroako Unibertsitate Publikoa (NUP). Sario eraikuntza

Foro honetan galdera nagusi honi nahi diogu erantzun: Nola artikulatu daitezke hizkuntza eta kultura politikak, eleaniztasuna eta kulturartekotasuna, euskara eta euskal kulturaren transmisioa bermatzeko?

Hizkuntza eta kultura politikek zein gorputz hartzen duten izango dugu aztergai komunitate eleaniztun batean bizikidetza eta kohesioa bermatuko duen ezagutzaren garapenerako erronkak eta proposamenak lantzeko helburuarekin.

Partekatu:

Testuingurua

Aurkezten den foro hau Euskarabidea-Euskararen Nafar Institutuaren eta Eusko Ikaskuntzaren arteko hitzarmen markoan kokatzen da. Nafarroako Foru Diputazioa izan zen 1918an Eusko Ikaskuntza sortu zuen erakundeetako bat Araba, Bizkaia eta Gipuzkoako Foru Aldundiekin batera. Egun, garai hartan hartutako erantzukizuna sustatzeko lankidetza eremuak abian jartzea bilatzen du aipatutako hitzarmen markoak.

Kohesioa eta bizikidetza helburu, euskal gizartearen eta kulturaren adierazpide guztien iraupenak eta finkapenak duten garrantziaz jabeturik, gogoeta, ikasketa, ikerkuntza eta prestakuntza sustatzeko elkarlan eremua dugu hau.

Jendarteak, aldaketa handiei ez ezik, etengabeko aldaketen abiadura bizkorrari ere egin behar die aurre. Ziurgabetasun egoeran bizi gara. Errealitate honek eta erronka globalek eskatzen dituzten galderak eta erantzunak topatzeko premia dugu, egungo errealitatea hobetuko duten tresna eraldatzaileak sortzea beharrezkoa dugu.

Testuinguru honetan, beste kulturekin solasean, euskara eta euskal kultura modu iraunkorrean bizitzeko moduaz pentsatu beharra dago. Gure baitako errealitate anitzak ulertzeko premia dugu, gure baitako aniztasuna kudeatzeko behar ditugun tresnak lantzeko beharra dago kohesioa eta herri iraunkortasuna helburu.

Ezagutzaren garapena inklusiboagoa eta bidezkoagoa izan dadin, aldaketa sakonak behar genituzke; horretarako partekatu eta sustatu nahi ditugun balore eta praktika kolektiboak definitu beharko ditugu.

Eta beharrezkoak diren aldaketen “nolakotasunari” erantzun egokia eta bidezkoa eman ahal izateko garrantzitsua izango da tokitik hausnartzea eta tokiko politiken markoa aztertzea dagoeneko komunitatea kohesio bidean jartzeko ahalegina egiten duten praktikak eta esperientziekin alderatuz.

Helburuak

Foroaren helburu nagusia hizkuntza eta kultura plan integral bateranzko marko partekatua eraikitzeko zorua sortzea izango da.

Galdera nagusi honi nahi diogu erantzun: Nola artikulatu daitezke hizkuntza eta kultura politikak, eleaniztasuna eta kulturartekotasuna, euskara eta euskal kulturaren transmisioa bermatzeko?

Horretarako, hizkuntza eta kultura politikek zein gorputz hartzen duten izango dugu aztergai komunitate eleaniztun batean bizikidetza eta kohesioa bermatuko duen ezagutzaren garapenerako erronkak eta proposamenak lantzeko.

Kuantitatiboki eta kualitatiboki bilgune esanguratsua biltzea nahi dugu egitasmoaren definizio partekatu zilegia bermatzeko. Indar berezia jarriko dugu Nafarroako eremu ezberdinetako pertsona eta kolektibo gako eta anitzak elkartzeko euren arteko konfiantza testuingurua eraikitzeko asmoarekin.

Planteatzen dugun galderari erantzuna emateko erronkak eta garapenerako proposamenak landuko ditugu kulturatik, arteetatik, sozio-ekonomiatik, zientzia eta teknologia esparrutik, erakundeetatik, hezkuntza komunitatetik, …

Metodologia

Foroan aplikatuko den metodologia EHUko parte Hartuz master eta ikerketa taldearekin, Aztiker soziologia ikergunearekin eta Elhuyarrekin lankidetzan garatuko da. Parte hartze metodologiaren bitartez, gogoeta eta deliberazioan oinarritzen den foroa burutuko da. Bilduko den taldea talde txikietan banatuko da, 7 pertsonez eta dinamizatzaile batez osatuko taldeak sortuko dira.

Aurretik, hausnarketa markoan kokatzen laguntzeko, hizkuntza eta kultura politikek non egiten duten bat eta non elkar oztopatzen diren azalduko digun hitzaldia izango dugu.

Hitzaldi markoak eskainiko digun proposamenean sakontzeko, eleaniztasuna eta kulturartekotasuna, euskara eta euskal kulturaren transmisioa lantzen dituzten esperientziak eta praktikak ezagutuko ditugu.