Eusko Ikaskuntza-Laboral Kutxaren Humanitate, Kultura, Arteak eta Gizarte Zientzien Saria

Informazioa

Eusko Ikaskuntzak eta LABORAL Kutxak, 1995ean, Eusko Ikaskuntza-Laboral Kutxaren Humanitate, Kultura, Arteak eta Gizarte Zientzien Saria eratu zuten, Humanitate, Kultura, Arteak eta Gizarte Zientzien alorretan jardueran dauden pertsona ospetsuak nabarmentzeko.

Eusko Ikaskuntzak lurralde arteko guneak sortzen ditu, pentsamendu irekia, anitza eta elkarlanekoa garatzeko, eta horietan, bere baitako eta euskal zientziaren, gizartearen eta kulturaren alorretako aditu eta eragileen parte-hartzea sustatzen duelarik. Horien artean, bere arloan nabarmentzen dena bereizten eta bere ingurunearentzat eredu bihurtzen saiatzen da Eusko Ikaskuntza.

Eta horixe da, hain zuzen, Eusko Ikaskuntza-Laboral Kutxa Saria sortu izanaren arrazoia. Euskal Herriko humanitateak, kultura, arteak eta gizarte-zientziak ikertzen eta lantzen dituzten pertsona ospetsuen bikaintasuna nabarmendu nahi du sari honek.

Saria jasotzeko hautagaiak curriculuma ebaluatzeko arauak zorrotz eta objektiboki aplikatuta hautatzen dira. Horretarako, epaimahaiaren osaera horren bermerik handiena da; Euskal Herriko zazpi unibertsitateetako ordezkariak parte hartzen dutelarik.

MONTXO ARMENDARIZEK IRABAZI DU Eusko Ikaskuntza-Laboral Kutxaren saria 2017

Montxo Armendárizek lortu du Euskal Herriko curriculum nabarmenenei ematen zaien Eusko Ikaskuntza – Laboral Kutxaren Humanitate, Kultura, Arte eta Gizarte Zientzien Saria 2017. Eusko Ikaskuntzaren jarduera eremuko zazpi unibertsitateetako Errektoreen ordezkariek, Eusko Ikaskuntzako Lehendakariak eta Laboral Kutxako Lurralde Zuzendariak osatu duten bileran hartu zuten erabakia aho batez. "Honoris Causa Doktore izendatu zuen Nafarroako Unibertsitate Publikoak 2010ean” azpimarratu dute epaimahaikideek. “Azken 30 urteetako funtsezko zinema-zuzendarietako bat da. Bere lanak oso modu berezian irudikatzen du belaunaldi oso bat, tokiko esparrutik harantzago joan diren eta publiko zabalari iristea lortu duten egunerokotasuneko istorioetan oinarrituta. Bere lan askotan, Euskal Herriaren alderdi bisualak, kulturalak eta etnografikoak islatzen dira".

Egindako lan horri esker, sari ugari jaso ditu erakunde publikoen nahiz sektore zinematografikoko bere lankideen aldetik: 1998an Vianako Printze Saria, 1998an Zinema Sari Nazionala, 2008an Eusko Ikaskuntzaren Manuel Lekuona Saria eta 2015ean San Francisco Javier Saria. Oscar Sarietarako izendapena jaso zuen, Donostiako Urrezko Kontxa jaso zuen eta hainbat Goya Sari eskuratu ditu.

Eusko Ikaskuntza-Laboral Kutxaren Humanitate, Kultura, Arteak eta Gizarte Zientzien Saria