2021-2023: Gauzatutakoa - tarteko txostenak

Orain arte gauzatutako fasean, bi helburu nagusi lortu nahi izan ditugu :

1. Euskal Herriko lurraldeetako herritar giltzarri-zubigileak, gazteak, interesdun aktoreak, hezkuntza komunitateak… identifikatzea eta konektatzea;
2. Lehentasunezko gaiak modu partekatuan eta lurraldetasun ikuspegi batetik identifikatzea.

Horretarako lurralde desberdinetan foro parte-hartzaileak burutu ditugu -Donostian, Kanbon, Iruñean-, eta gazteen ahotsa jasotzeko berariazko foroa gauzatu ere. Zein da Euskal Hezkuntza Sistemak jorratu beharreko norabidea galderari erantzuterakoan, etorkizuneko euskal hezkuntzak sustatu eta sendotu beharreko helburu komunak identifikatu dira.

Burututako gogoeta prozesuan “Euskal Herriaren kohesiorako tresna gisa, euskara eta euskal kulturaren transmisioa ardatz duen euskal hezkuntza sistema sustatu eta garatu beharra” izan da identifikatu den garatu beharreko lehentasuneko helburua. Etorkizuneko Euskal Hezkuntza Sistemak hartu behar duen norabidea definitzeko, helburu nagusi hau azterketarako ardatz nagusi gisa planteatzen da, identifikatutako gainontzeko printzipioak barne-bilduko dituenak:

• Ikasleak erdigunean jartzen dituen hezkuntza sistema. Ikasleen ongizatea, bizitza baldintzak eta heziketa xede. Honetan, kapital kulturalaren garrantzia nabarmentzen da.
• Herritar euskaldun arduratsuak, ahaldunduak, sortzaileak eta eraldatzaileak sortzen dituen hezkuntza sistema. Ingurumenarekin, tokiko komunitatearekin eta erronka globalekin arduratzen direnak.
• Jendarte kohesionatuaren eraikuntzan lan egingo duen hezkuntza sistema.
• Aukera berdintasuna bermatzen duen eta intersekzionalitatetik berdintasuna lantzen duen hezkuntza sistema.
• Euskal Herriko Hezkuntza sistema bakar baten ideia lantzen eta garatzen duena.
• Hezkuntza komunitateak ahalduntzen duen hezkuntza sistema. Tokiko gobernantza eredu komunitarioak, partekatuak eta Euskal Herri mailako eredua garatzen dituenak.
• Osotasuneko barne kongruentzia garatzen duen sistema, egitura sistemiko eta zirkular gisa garatzen den sistema. Etapa guztiek osatzen duten ekosistema trinkotzeko ezinbestekoak diren egiturazko zehar-lerroen definizioa eta sintonizazioa lantzen duen Euskal Hezkuntza Sistema.

Jasotako printzipio hauek hurrengo urratsen azterketaren abiapuntuzko oinarri orientatzaile gisa hartuko ditugu.

EUSKAL HERRIKO HEZKUNTZA SISTEMAREN LIBURU ZURIA

• Foroa: 2022/10/22

  Hizkuntza eta Kultura plan integral baterantz. Ezagutzaren garapena komunitate eleaniztun eta kulturaniztun batean

• Foroa: 2022/10/15

  Euskal Hezkuntza Sistema, etorkizuna lantzen: Iparraldeko ahotsa eta azpimarra

• Foroa: 2022/06/18

  Euskal Hezkuntza Sistema, etorkizuna elkarrekin lantzen. Gazteen ahotsa eta azpimarra

• Foroa: 2021/09/11

  Ehun zubigile hezkuntza sistemaren etorkizuna elkarrekin lantzen

EUSKO JAURLARITZAREN HEZKUNTZA SAILAREKIN LANKIDETZAN

• Jardunaldia: 2023/03/04

  Segregazioari nola erantzun hezkuntza sistematik? Ulermen partekatua eta erronkak kudeatzeko proposamenak

• Foroa: 2022/09/17

  Askotariko segregazioari nola erantzun hezkuntza sistematik? Ulermen partekatua eta erantzun proposamenak

• Foroa: 2022/06/04

  Askotariko segregazioari nola erantzun hezkuntza sistematik? Adostasunerako bide partekatu baterako oinarriak

• Sinposioa: 2021/10/22-23

  Euskal Hezkuntza-Sistema: adituekin solasean, herritarren azpimarra

Eusko Legebiltzarrean agerraldia
Eusko Ikaskuntzak parte hartu du etorkizuneko euskal hezkuntza sistemari buruzko akordioaren oinarriak zehazteko

Urteko Galdera 2020-2021
XXI. mendeko Euskal Herriak, nolako hezkuntza sistema behar du?